雖非首次揸林寶,但香港地多車多燈又限速,點及今次喺意大利任劈咁過癮。廠方安排熱門型號LP560-4作試車,四輪驅動咬彎又好力,一隊細牛拉住龍嚟跑,震天引擎聲穿山過彎,仲壯觀過西班牙鬥牛節。
記者、攝影:徐影龍
鳴謝:Lamborghini
LamborghiniLP560-4
林寶堅尼意大利總廠,安排先睇碳纖研發部同博物館作熱身,翌日真正嚟料,派出四架LP560-4作試車,指定路線超過140公里。望住地圖,有大直路有山路,今勻肯定過足林寶癮。
四架LP560-4有黑有白,要深切感受意大利田園遊車河,當然首選開篷Spyder嚟揸。一撻引擎,四架車輪流發出震天隆隆聲,仿似行咗個連環旱天雷一樣,真正未出發先興奮。座椅唔算太低沉,不致於瞓喺度揸車咁辛苦,試車初段,都係穿過市區樓房同迴旋處為主,反倒可掂住油門,輕輕鬆鬆享受「蠻牛踱步」,就算窄路遇着對頭車,亦毋須像過往「大牛」Murcielago般,需要側晒身避車,呢點亦係現今Gallardo最與時並進嘅一點。
狂操+/-如馴牛
進入廣闊郊區,蠻牛都係時候舒展吓筋骨。齋以全自動D波發力直飆,波箱反應同引擎轉速已迅速配合到,幾秒內時速已過百公里。雖然清晨9點出發,但迎面凉風吹得人好醒神,陽光喺蔚藍天空徐徐照耀,再開住篷感受一下四野無邊際草原,呢啲先係真正遊車河,唔似香港道路咁,四圍都係燈柱同欄杆咁大殺風景。
開始踩山玩上坡道,彎多但未算急,憑藉四輪驅動,LP560-4應付得綽綽有餘,反而考驗駕駛者攞線經驗。接着一段段較急S彎,想疾衝就要轉番+/-波,波箱反應變得更快更利落,拖2、3波入彎的確夠晒Power抗衡離心力,好玩又刺激。問題係+/-波不適當急上急落,引擎會發怒咆哮兼車身頓挫,揸同坐都唔舒服,呢點就係需克服嘅「馴牛」技巧之一。揸完140公里,最大感受係快慢都有唔同享受,就算作日常代步都可以。
引擎:5,204ccV10
馬力:560hp/8,000rpm
扭力:540Nm/6,500rpm
傳動:6速E-Gear+/-波箱