地產霸權先將小市民榨乾榨淨，之後係咁意掟幾億出嚟話做慈善，實質只想紓緩吓所謂嘅仇富情緒。呢啲伎倆一早俾公眾識穿，所以當煲呔宣佈成立100億關愛基金時，公眾只覺得班認捐富豪似買贖罪券。煲呔噚日喺港台節目《給香港的信》死撐，話關愛基金係大膽建議，政府除咗撥款畀社福界外，要負責埋籌款。咁講法，即係個政府要扶貧，就先要喺出面撲水，真係唔知庫房咁多儲備要嚟做乜。
為繼續監察拒申請
大家對呢類「洗底基金」反應都幾冷淡，好似首富早排掟咗3億出嚟搞個乜嘢香港仁香港愛公益行動，噚日截止申請，唔少環保團體、基層組織都講明要監察大財團，唔認同阿首富大小通吃，所以不為五斗米折腰。例如關注少數族裔嘅融樂會，因唔少受助者唔妥超市啲嘢貴到飛起，唔妥官商勾結，所以唔會申請呢筆錢。
幫助窮人嘅社區組織協會，一直做開持續長遠嘅工作，所以首富呢個要人哋喺一年內完成計劃嘅基金唔啱佢哋口味。地球之友、綠色力量、綠色和平等環保團體經常批評地產商，為咗繼續監察，所以都唔受首富恩惠。綠色力量行政總幹事文志森就話，因為申請手續繁複，所以唔好預佢。