夏雨自從呢幾年返咗無綫拍劇，都拍咗唔少作品，近日佢為內地粵曲節目做評判，接受訪問時難免講吓電視經，之前亞視同有線向廣管局投訴無綫壟斷歌星嘅情況，估唔到身為無綫人嘅夏雨竟然直指呢個局面好唔健康。
講到無綫獨大，夏雨訪問時表明態度話唔贊成：「我當年喺台灣發展時，藝人可以隨便亮相其他電視台，唔會似香港咁，一家獨大，搞到藝員只可以喺無綫苟且偷生，如果呢種獨大情況繼續，只會影響藝員嘅前景同發展。」夏雨都希望嚟緊電視圈可以有一番新景象，不過佢又好慨嘆咁話：「但係亞視有魄力崛起同無綫平起平坐咩？」
彈編劇思維僵化
啱啱播完夏雨有份主演嘅《翻叮一族》，收視麻麻兼被彈話抄韓劇，夏雨話：「無綫其實係一間劇集工廠，每年十幾二十部電視劇咁製作，編劇就只有幾個人，劇種來來去去都係嗰啲，況且編劇思維都可能僵化，有咁情況都在所難免。」
夏雨仲話觀眾習慣睇大製作好似《溏心風暴》同《宮心計》，所以唔會太喜歡小本製作。