幾年前余若薇曾經同退休高官鄺其志喺商台開咪做節目《薇言大志》，06年創辦公民黨，商台指政黨領袖唔應該做主持，節目無疾而終，事隔幾年，余大狀有機會再開咪，今次轉移陣地到網台，今個月19號起逢周二晚9點至10點喺OurTV做節目《薇言大智》，同之前個節目名只差一字，取其大智若愚之意。
《薇言大智》首集主題係同教育局孫公算小班教學嘅賬，余大狀請孫公做嘉賓，孫公就派政助楊哲安做代言人，另一嘉賓係教協教育研究部主任葉建源。公民黨逢周二開執委會，OurTV錄影廠同公民黨總部都在北角，日後開完執委會去開咪，十分方便。