金融炒家喺外滙市場搞搞震，獨立經濟學家Andy謝國忠睇唔過眼，喺自己個「部落」網教日本央行裝呢班金融大鱷彈弓！
老謝篇文章以「IfIwereBoJ……（假如我係日本央行……）」為題，佢話會裝一個局，引呢班滙市大鱷落叠！首先假裝干預滙市但失敗，引滙市大鱷加大注碼，做法係先同美國財政部發動口水戰，不過每次都表現驚青；又會每日靜靜沽售10萬日圓，而又未能完全應對熱錢流入，令美元兌日圓慢慢跌，同時成交量上升；呢個遊戲持續兩個月，畀美元跌至近60日圓低位，直至吸引達500萬億日圓炒家資金落叠，平均造價75日圓水平。
中央會係大鱷嘅好對手
到呢個時候，佢先至正式發動攻勢，宣佈喺120日圓水平無限量供應日圓，令呢班滙市大鱷即時損失312萬億日圓，要即時調整持倉策略止血。而當所有大鱷平倉後，佢先至會將日圓滙率再次浮動，同時會徵收貨幣交易稅率0.1%，以防止再有炒賣。
老謝話，家大多數交易嚟自金融機構而非跨國企業，滙市大幅波動令到商界生意難撈。不過佢相信日央行唔會跟佢做，大家惟有等待人幣自由兌換，而中央將會係呢班大鱷一個好對手……即係話大家等睇戲喇！
李華華
mailto:[email protected]