「噗、噗。」腥紅的血液在光滑的坐廁邊緣蔓延，深埋在子宮內膜的兩個生命被強行剝離，穿過陰道，脫離母體；香燭燃燒，青煙緩緩上升，輕柔地撫慰嬰靈，「婆婆，係咪綠色o架？」索K女孩之間的傳說是這樣的──索了K，腹中的胎兒就會染上慘綠。電影《墨綠嫣紅》說的這一節，來自真實故事。
索過K粉後，小嫣在公廁過了一個晚上，醒來換上校服，搖搖晃晃走進試場，趴在書桌上睡眼半張，試沒有考成，踢着鞋坐在學校天台看雲聚雲散。
太陽下山後時間很漫長，屋邨大堂外，小嫣跟同學奀妹相遇，一個把墮胎藥拋上拋下，一個凝神看着電梯數字，一直到電梯門關上，奀妹忽然冒出一句熟練的「嫣姐姐」，小嫣露出鄰家女孩的溫柔，「咁夜嘅？」住在走廊兩面的兩個女孩，一個補習後準備翌日上學，一個抽完煙，準備回家墮胎。
分岔路。
袁小雲個子小小，神態怯怯的屋邨女孩，說話時弓起背、低着頭，沒施半點脂粉，從小到大都想當演員，是《音樂人生》導演張經緯新作《墨綠嫣紅》的女主角，在青年中心學做蛋糕，導師介紹她試鏡，結果被選上。
友人索K上癮悔當初
小雲演小嫣的時候14歲，問她印象最深刻的場景，她先說起墮胎的一幕，然後談到主角索K後考試，女孩關心的，是自己的演技多一點。「因為嗰一幕要表現到好痛，要係咁嗌，我唔夠膽放聲嗌，拍咗好耐。學校嗰場呢，索咗K之後要點樣行，交叉腳行，眼係要合埋定係睜開定點？都要人教。」
小妮子覺得自己幸運，希望把握演出機會，對於片中的故事，她說：「幾離譜，索咗K仲返學考試。」「幾驚訝，個社會發生呢啲事，好似冇辦法控制到，索到日夜顛倒，工又唔做、學又唔返。」
似乎是別人的故事。
兩年前的夏天，小雲準備升中三，暑假跟朋友坐公園，通宵不回家，「反叛囉，其實都冇乜嘢做，係傾吓偈，覺得好好玩、好自由，冇阿媽煩我，又唔使煩返學」。
第一次，她目睹別人索K。「索開真係面青唇白，個樣好殘，對眼凹晒，上腦上得多，完全唔知自己做緊乜，都幾恐怖，佢哋知道呢樣嘢唔好，叫我千祈唔好試，但自己又戒唔到，有時成日唔食飯，見過有啲磨牙越磨越大力，十幾歲半隻牙冇咗。」
她亦遇過朋友幻聽，「我乜都冇講，佢聽見我話好凍，又話我講唔畀張被佢冚，佢哋可能一開始都係貪玩好奇，都唔知上癮上成咁，後悔都嚟唔切，越食越多，成副身家用晒，家人都放棄，咪惟有幫人放（毒品），賺到錢又攞返嚟買」。
在小雲享受自由的時候，袁媽媽在家中乾着急，「媽咪好心痛，好唔開心，因為我乜都唔同佢講，我去玩通頂，佢喺屋企等電話，打嚟我嫌煩又唔聽，好曳，佢擔心會冇咗個女」。
一個晚上，小雲回家，母女二人從天黑談到天明，流淚眼對流淚眼，「我覺得好慚愧，之後就冇再搵佢哋（索K的朋友），我好感激佢（媽媽），好似我就嚟落地獄，拉返我上嚟」。
宣傳短片入圍金馬獎
跟毒品漩渦擦身而過，小雲深感幸運，今時今日看到毒販被捕的新聞，會想起從前的朋友，「會諗佢哋家點呢？係咪繼續咁樣落去呢？」
此片集合了三個少女的真實經歷，原是禁毒基金贊助的「警世」宣傳短片，結果入圍金馬獎最佳創作短片，將於香港亞洲電影節首映。對於演藝工作，小雲躍躍欲試，小聲的說會把握機會。張經緯剔起她的臉，說她的臉小，鼻子也高，怎樣拍也好看，但要當演員，還是要下更多苦功。袁小雲會變成o靚模一分子嗎？準備好露事業線沒有？
分岔路。
記者 張嘉雯