「籃球之神」米高佐敦（MichaelJordan）近日捲入是非之爭，挑起呢番事端正正係米高佐敦本人，佢近日不斷明示、暗指32歲湖人後衞拜恩（高比仔），偉大程度不及自己，仲話高比仔最多只係史上Top10最勁嘅後衞，嘩！波神搞咩去到咁盡呀！
米高佐敦（MJ）生涯5奪常規賽「最有價值球員」、助公牛6奪NBA總冠軍嘅，現為山貓隊嘅班主，佢嘅名字幾乎無人不識。因電玩遊戲《NBA2K11》今年搵咗這位波神做封面代言人物，所以佢就近排就四出宣傳呢隻Game，亦由於個Game入面仲有好多佢嘅經典賽事，傳媒自不然又要問起「經典」、「偉大」等之類問題。
波神：攞100分話咁易
唔知係咪高比仔若果喺今季助湖人3連霸，生涯將第6次捧總冠軍，將追平咗MJ嘅紀錄，所以已經入選名人堂（HallofFame）嘅MJ，係咁寸爆高比仔，搞到球壇掀起熱論潮；而最熱論嘅話題係包括MJ指自己可以場場入100分，同埋話高比仔只係史上頭10位最勁嘅後衞。
呢兩個言論表面上冇咩關係，查實MJ都係寸緊單場曾獲81分嘅高比仔。皆因MJ話家球證吹罰尺度較鬆，以佢當打時嘅體力化打法，好容易攞100分（註：MJ生涯單場最高為69分）。而超過26,000名球迷亦喺ESPN投票，結果近5成球迷贊同家比賽尺度容易得分咗，間接力撐MJ嘅言論。
高比仔示威熱身賽發力
波神暗寸高比仔要靠球例先至容易得分後，日前更明示後者唔係咁勁：「我知道高比仔有被討論為『最偉大球員』，但是如果要我為他排名，淨係計後衞的話，他只會係前10名吧！」波神咁講法，即係話高比仔都唔係最勁嘅後衞，又何來討論佢係「最偉大球員」呢？
唔知係咪畀MJ嘅言論激親，仍受膝傷困擾嘅高比仔突然表現積極，一反之前熱身賽懶懶閒嘅表現，喺上周六搶得18分及8籃板，球隊亦喺熱身賽以102:95贏金塊，睇吓呢場「寸嘴」之戰，最終會點收科？
