綽號「超級丹」嘅林丹（圖），比賽生涯贏盡錦標，好似08年京奧一圓男子單打冠軍夢，現時只欠一枚亞運單打金牌，所以日前佢講明好恨贏今屆亞運。而中國羽毛球隊日前亦公佈亞運名單，林丹、陳金將出戰男單賽事。林丹下周就會隨隊到廣州作閉門集訓備戰，佢喺出發之前亦趁機喺上周六relax吓，順便補祝自己上周四嘅27歲生日。
上周六喺北京舉行嘅生日會可謂人頭湧湧，林丹嘅女友謝杏芳、父母、國內娛樂圈好友、大批球迷都有撐場。搞到林丹最為感動嘅係，粉絲們用咗超過1,000張佢嘅相，湊合成一幅巨型嘅林丹肖像。睇吓林丹獲得咁多祝福，喺今屆亞運會否一圓心願！