恕我小人，我是懷着一點「睇你點死」的心態去杜拜。這些年來大興土木要幾浮誇有幾浮誇的各種項目，齋聽都令人長嘩10秒。點知一句「債務危機」，似乎一針篤破番梘泡，殊不知大佬阿布扎比挺身而出。在即將抵埗的航機上見到TheWorld日夜趕工，呢個沙漠上的神話尚未破滅，短短一天足以發現七不可思議。
記者、攝影：曾冠輝
鳴謝：阿聯酋航空
1.828米巨人跟總統姓
去年危機消息一出，最關心是號稱人類史上最高建築物BurjKhalifa平唔平到頂？結果，又俾佢搞掂，多得大佬阿布扎比過水，更多得阿聯酋總統出手泵水。年初開幕當日仲索性連名都改埋跟總統姓，由工程之始叫咗好幾年的BurjDubai改為BurjKhalifa，叫做得人因果千年記。
BurjKhalifa高828米，比國金二期高出一倍有多。遠望BurjKhalifa，感覺就似姚明走入幼稚園，周邊統統是膝蓋未及的塞豆窿。作為遊客，齋企腳邊仰望拜倒石「樓」裙下真係望到頸椎移位，都係走上膊頭居高臨下過癮啲。位於124樓設有一個觀景樓層TheTop，360度環迴俯瞰四周，此刻才會驚覺，浮誇至極的杜拜四野其實是荒蕪一片沙漠。不過實不相瞞，我無上TheTop，都怪我事先沒有預約，walk-in票價要成8嚿幾，預約則只需2嚿！惟有喺度提提你啦！
網址： http://www.burjkhalifa.ae
票價：walk-in$845，48小時前預約$212
2.鯊魚游商場
以為mall最多不過多嘢買，點會估到DubaiMall無喇喇有個打入健力士紀錄大全的「金魚缸」？仲有成51米長、11米高，不過入「冊」者不是魚缸size，而是一條32.8米的水底隧道，唔使識潛水都可輕鬆欣賞海底世界。魚缸既然夠大，當然唔止養兩條「毛仔」畀你睇吓，魔鬼魚龍躉連鯊魚都有齊，我哋就話：喺海洋公園見過啦！但對自細喺中東沙漠國家長大的當地人來說，這簡直是：Amazing！
網址： http://www.thedubaimall.com
門票：$64
3.沙漠噴廿呎水柱
杜拜此地，理應石油多過水，落機一刻見機場一列人造瀑布，再有商場巨型金魚缸，這個沙漠國度實在是「以水晒財」。還未夠，仲要每晚在DubaiMall外的BurjKhalifaLake定時上演一幕噴泉滙演，十足LasVegas的fountainshow，不過水池更大，佔地30公頃，射出150米水柱配合音樂、燈光，加上BurjKhalifa做背景，是杜拜最人氣的節目。
（時間：平日6pm-10pm、周末及假期4pm-11pm，每半小時一次）
4.Armani格仔酒店
BurjKhalifa巨杉之內係咩？大家似乎都一頭霧水，網頁透露這是座集辦公室、住宅、酒店及娛樂的綜合巨樓。還有3月開幕世上首家的ArmaniHotel。160個客房全部滲透了Armani的設計特色，包括金銀格仔wovenpattern等signature都可見於房中。部份套房更由Armani親自操刀，用上Armani/Casa的家具佈置。對fans來說，住一晚酒店就像宅男可與周秀娜拍一日拖。
房價：ArmaniStudio每晚$5,070起
網頁： http://dubai.armanihotels.com
5.黃金擺滿街
因為免稅，加上集中，杜拜是全球黃金價格最平之地。雖然在DubaiMall也有另闢區域開滿黃金首飾店，但都不及在老城區的黃金市場（GoldSouk）一般黃金遍地。短短二百米的大街，兩旁開滿幾十家金舖，櫥窗掛滿金器首飾，射燈之下閃到張不開眼。不過要買平金，都係要靠你牙力，間間金舖全部有價講，起碼可殺個兩成。
6.杜拜人非杜拜人
行走中東，或許會怕言語不通，不過在杜拜完全無問題，因為身處杜拜的人大都不是杜拜人。據統計，在接近180萬人口中，只有約17%是阿聯酋國民，其餘超過八成是來自巴基斯坦、伊朗、巴格達、菲律賓及中國等亞洲人，點解？搵食囉！由商舖看店的、酒店服務員，以至的士司機，行程之中所遇到的沒有一個是土生土長杜拜人，相信世上沒有比此更符合「聯合國」之稱號，如此大家自然用國際語言來溝通啦。
7.40℃炒雪糕
杜拜熱，日頭閒閒哋都40℃，這樣你就明白點解去到杜拜都仲要行商場。同樣在DubaiMall，找到比冷氣更能即時消暑的良品，炒雪糕是也！在雪櫃選好心水口味，店員將雪糕放在一塊接駁製冷的石板上，然後開始「炒」，務求將各種口味的雪糕炒個水乳交融。我嘛，很保守，選了西瓜、橙味加呍呢拿，清甜水果味道不會太奇怪。
AmazingDubai
溫馨提示：如想拍攝噴泉表演，最好在日落時分天空尚有紅霞之時，背景會更靚。
TravelMemo
持特區護照免簽證，BNO則須簽證。阿聯酋駐港領事館：28661823
乘阿聯酋航空，香港杜拜來回機票由$6,479起。阿聯酋航空： http://www.emirates.com
1UAEDirham約兌2.1港元（文中價錢已折算港元）
220V，三扁腳插座
杜拜
下周天晴，27-37℃
