皮膚專家醫生Ｆ去年搞咗一個「時光穿梭金曲慈善夜」，在灣仔會展中心舉行，竟然賣個滿堂紅，為「關懷行動」籌得善款二十萬元，大受鼓勵之餘，今年又連同一班唱家班友好，在十月三十一日晚上於灣仔會展中心，再搞一個「小扁擔覓知音慈善夜」，將音樂會所得款項捐畀「小扁擔」在內地辦小學。
「小扁擔」於一九九五年創立，係香港中文大學校友會聯會教育基金會有限公司屬下一個教育慈善組織，專門在內地支持貧困農村教育，至今在廣東、湖南、四川、甘肅、廣西已經捐建四十幾間中小學，每年發動義工定期巡訪七十幾間資助網內農村學校，所謂資助包括獎助學金，教師培訓，圖書文具用品，教具教材設備等等。小扁擔捐款絕不扣除行政費用，由義工親身跟進，歷年有不少中大校友及家屬以至親友等等參加義工陣營，不少校友捐款之餘，仲帶埋仔女到農村訪問受捐助學校，讓子女憶苦思甜，知道幸福不是必然的，世界上還有好多人讀小學都有財政問題，內地一個奇異現象就係中國以總財富計算，全球數一數二，外匯儲備世界第一，可以送衞星環繞月球拍照，但中國不少農村連辦一間小學都舉步維艱，故此小扁擔有其存在意義。（小扁擔網址：www.xbd.org）
醫生Ｆ自己登台之外，邀請埋一班朋友梁美珠、朱育民、關悅蘭、陳燕玲、馬維業、蔡秀蓮、DmitriyArsiriy、黎蕙蘭等等上台載歌載舞，特別嘉賓係中大學生歌神蔡梓銘（第一屆亞洲星光大道季軍），音樂總監係鄧志和（第一屆亞洲星光大道音樂總監）。
與醫生Ｆ傾完電話之後，又在上星期六晚宴會中遇上，醫生Ｆ話門票已經賣得七七八八，希望各界友好繼續支持，打電話到5185-3217搵何小姐查詢，聽歌兼做善事。呢晚宴會之中，有不少抽獎獎項與皮膚護理有關，朋友見到醫生Ｆ太太，同佢開玩笑，「搵太太做代言人啦！」點解呀，因為Ｆ太在燈光映照下，直情身光頸滑，面白帶紅，睇落去就非常滑溜，可能係醫生Ｆ悉心照料之故，不過醫生唔可以搵代言人做宣傳嘅。