吸血鬼題材的電影長拍長有，每齣戲嘅吸血鬼都有唔同死法，《屍城30夜續集》內的吸血鬼用刀用子彈就可以殺死；而且成日尖叫，啱晒用嚟試吓高音效果的發揮。Halloween唔一定要去同人逼酒吧、玩鬼屋，睇吓驚慄片都可以好有氣氛。
記者：符樂
吸血鬼巢穴 睇黑色層次感
《屍城30夜》講述阿拉斯加某小鎮，有30日不見天日，吸血鬼乘機開大餐，殺晒全城人。嚟到續集，生還者史黛拉四圍去說服其他人相信吸血鬼的存在。首30分鐘只係交代史黛拉點樣加入獵殺吸血鬼行列，悶到抽筋，全屬廁所位。
其後史黛拉與同伴實行大反擊，深入吸血鬼巢穴！整齣戲大部份時間，都以陰暗的黑灰色作主調，例如在陰暗的走廊內，向吸血鬼掃射。DVD或許只會見到一大笪黑色，真係打乜都睇唔到，但Blu-ray的層次感就高好多，吸血鬼真係由遠而近撲埋嚟。
藍光碟啱試高音
尖叫唔係人類嘅專利，吸血鬼的叫聲更高更尖！當佢哋被陽光照射便會燒焦成黑炭狀，仲會一路尖叫。Blu-ray效果高音尖細，但絕對唔刺耳，當史黛拉再次深入吸血鬼巢穴，炸爆牆壁引進太陽，仲可以細緻地睇到吸血鬼的皮膚逐塊化灰。
屍城30夜續集
類型：驚慄
畫面：1.85:1
音效：DD5.1，DTS-HD
特別收錄：電影絕密片段、電影花絮、PS3壁紙
Halloween驚慄推介
《恐懼鬥室》血腥大賤賣
《恐懼鬥室》系列首幾集都會賣吓橋，營造恐懼感，未見血都心寒寒，家搞搞吓變成無血唔得。《恐懼鬥室6：萬罰朝中》，警官荷夫曼承繼「拼圖殺人狂」衣缽，今次又捉咗幾個受害者，逼佢哋玩遊戲，其中最殘酷的一項，是讓一個人決定六個人生死的輪盤遊戲「喧鬧酒會」。
《生化危機3》死亡列車
《生化危機3絕種生還者》女主角艾莉絲逃出安布雷拉公司的實驗室之後，整個城市已經淪為廢墟。拉昆市大災難後，僅存的生還者企圖穿越沙漠，前往阿拉斯加。艾莉絲加入了難民移動車隊的行列，沿途他們必須保持警覺，準備抵抗喪屍及喪雀攻擊。
查詢：DVDPro（23326326）