「啲麪好好食呀！」是我來到安徽馬鞍山的最大評語，前提是小記不愛吃麪的，「二○五老面館」能夠得到我本能的稱讚，的確是有番咁上下水準的，難怪大家食杯麪都開始選擇康師傅，內地做麪的實力絕不能忽視！
記者︰吳美美
攝影︰林栢鈞、吳美美
鳴謝︰興隆食品有限公司
五花腩脆身
香港人，早餐多數食乜呢？早餐A轉多士、凍檸茶，安徽人呢？整碗當塗大肉麪加蛋先啦！呢碗麪，以香港人腸胃可能會頂唔順，請自行食條蕉打打底先，因為安徽人煮食重油，愛用豬油，仲有愛辣，基本上叫任何食物都預先加辣的。呢碗大肉麪，我是在「二○五老面館」吃到的，店名的數字是因為它曾在馬鞍山二○五國道（國內公路的叫法）開店，專門招呼貨車司機，現時搬到佳山路。因為「二○五」這個名字打響了名堂，假冒者亦隨之而來，所以請認住招牌上「鍾福聚」三字才是正店。經營小店的是一對王姓父子，一個打麪，一個煮湯，說話不多，卻有默契。小店麪類選擇不多，大肉麪加蛋自當首選。將大肉麪逐步拆解，大肉其實是滷豬肉，先將五花腩水煮至七八成熟，撈起再炸至膠膠哋，目的是將多餘油份泡掉，再切成一片片，滷約一個小時，大肉咬落爽脆，有淡淡的滷香；麪則是自家手拉兼刀削，每碗煮5分鐘就有得食，還有那個煎蛋，實際是炸蛋，蛋面有層脆脆，浸湯再食，好正囉！麪身等到我呢班記者影完仲未腍，闊度又切得剛好，仲好好頭，不嗜辣者宜少放酸菜，朝頭早八點幾真係唔好食咁多！
a.二○五老面館
地址︰安徽馬鞍山市當塗縣佳山路2號
後巷炭爐肥腸米線
小鎮最多家庭式小檔，有些更是位於後巷，眼大啲都睇唔到呢家肥腸米線，走入類似由鐵皮搭成的小店，大大個廚房出現喺面前，見他們還是用炭爐煮麪，火候夠勁。肥腸米線送上枱時，又是又紅又油，但已經唔會俾佢嚇倒。估唔到肥腸其實不油膩，原來店主已將肥膏切晒，又用鹽辟羶味，再切成一小塊，食落彈口無臭味，小辣仲好惹味，記得走味精，先食得出真味。小驚喜是那碟幾蚊人仔的雞蛋炒飯，大家齊齊讚，應該是炭火令鑊氣飯味更強，用埋豬油更加無敵，放落口時飯粒分明，配榨菜食又一餐啦！
b.源潮肥腸米線
地址︰馬鞍山市花山區湖北路11號
