無綫台慶劇《巾幗梟雄之義海豪情》後日播映，李添勝及黎耀祥昨誇口稱若該劇不好看便「返大陸執牛屎」。祥仔又指《公主嫁到》是喜劇，不及《義》片能觸動人心，有信心得最佳劇集獎。
鄧萃雯、黎耀祥、陳法拉及黃浩然等一班無綫台慶劇《巾幗梟雄之義海豪情》的演員，昨日在監製李添勝率領下，在將軍澳宣傳，現場播映精華片段、主題曲MV及舉行祝酒儀式，眾演員又打鼓壯聲威。
李添勝、雯女及祥仔對該劇信心十足，添哥拍心口說：「如果呢套劇唔好睇，我返大陸執牛屎！」祥仔也和應說：「如果唔好睇，我陪添哥返大陸執牛屎！」雯女則謂：「咁我喺佢哋隔籬開有機農場。」連陳法拉也加入：「如果部劇收得唔好，我返美國執牛屎。」
自誇勝《公主嫁到》
雯女爆祥仔曾表示若此劇收視超過《大長今》，他便請演員們遊韓國，祥仔聞言縮沙說：「今年請唔掂，請食飯都難，最好拉埋雯女一齊。」祥仔後來表示相信收視必勝《大長今》，上次《巾幗梟雄》吸納不少觀眾，續集應會破上次的最高收視，祥仔又很有信心該劇可取得今年的最佳劇集獎，他說：「之前《公主嫁到》收得，但始終係喜劇，我哋呢部正劇易觸動人心，我好期望添哥可以冧莊攞獎。」雯女謂她有朋友特地請一星期假準備追看。
法拉剝衫成焦點
昨日會上播出精華片段，最搶眼一幕算是陳法拉除衫畫面，法拉以往曾在《有營主婦》中換衫成為一時佳話，她說：「今次同上次好唔同，因為今次係日本軍人面前除，講我家人俾日軍捉咗，我犧牲自己嚟交換，意識好唔同。」她謂電視尺度有限，相信觀眾是注意其演出而非身材。
此外，在戲中演日軍的金剛昨日也一身日本軍服示人，麥長青竟叫他將釣魚台還予中國，金剛即迴避說：「我哋今日講《巾幗》，唔講其他嘢。」
採訪：張俊銘
攝影：黃文成
