【本報訊】特首曾蔭權在剛公佈的施政報告中聲稱，要塑造未來理想的香港社會。講就容易，做又如何？平等機會委員會主席林煥光狠批曾蔭權任內施政「全部冇深層次解決問題」，以「花樽冇爛就唔好搞佢」式的純粹回應式思維治港，令人失望。
「冇深層次咁去做」
林煥光在now寬頻電視新聞台評議特首施政報告，這位在港督彭定康年代做過公務員事務司及特首董建華年代的特首辦主任，毫不客氣狂數曾蔭權的施政不足。他形容曾蔭權過去五年的施政報告都是「斬件式零售式處理問題」，沒有整體、長期及宏觀的政策。
人口老化及貧富懸殊是香港最嚴峻的問題，林煥光批評曾蔭權沒有針對這兩方面提出長遠解決的方法。以貧富懸殊為例，他說：「香港嘅稅制長期都係對有錢人好有利，對低收入階層冇利。喺呢個情況下，我哋嘅政府需要一個長期政策照顧有需要嘅一群人，但係呢五年來嘅施政報告都睇唔到，次次都係零敲碎打咁，你講到樓價高咩，我就質1,000個咁嘅單位畀你嘆吓，然後你講到老人家需要照顧咩，我又畀幾百張床位，從來冇深層次咁去做，我自己覺得比較失望。」
自認在上下亞厘畢道（指特區政府）都神憎鬼厭的林煥光，自己只能口誅筆伐，平機會主席沒有職權處理人口老化、貧富懸殊等事務。罵完曾蔭權，他的矛頭又指向問責高官：「如果以平機會作為法定組織，我哋唔可以乜都攬上身，啲應該由政府帶頭o架嘛……護老安老工作一定係政府先做到，所有委員會只可以發聲，做就要由周一嶽、張建宗、林鄭月娥嗰批人帶住去做o架嘛。」
指申辦亞運時機差
對於港府力推爭辦亞運，曾經負責統籌奧運馬術項目的林煥光說，大型運動會可以凝聚民眾，但是否主辦則要看時機：「我諗到今時今日來講，我哋唔係話窮到燶，唔係話辦唔得到，以香港嘅工作能力來講，一定做得到，而且做得好㖭。但喺今時今日咁嘅環境，當貧富懸殊越來越大，當個社會覺得有好多急切嘅問題，我哋尚未解決而去提出辦亞運，咁個時機的確比較差啲。」
林煥光論三代香港領導
港督彭定康
彭定康1992年嚟到，一落到來就講未來五年要做乜嘢，去到最後一年就交代番家做咗啲乜。
特首董建華
董先生有好多宏大政策，例如教育投資，佢當時對住阿松（財政司司長梁錦松）講，cut乜都得，唔可以cut教育。
特首曾蔭權
我始終覺得五年來嘅施政報告都有一個環節比較弱，就係斬件式處理問題，冇整體、長期、宏觀嘅政策，次次都係零敲碎打，全部冇深層次咁解決，比較失望。
