誠哥捐5億，四叔捐4億，新地郭氏又捐4億，咁theone大劉捐幾多呢？華人置業發言人噚日回覆八方，話會向政府個關愛基金捐出兩億，其中一億係大劉私人名義，一億係以華置名義，仲補充話大劉同佢公子劉鳴煒都好支持呢個計劃。嘩，2億買到好多個Hermès手袋o架喎，雖然對大劉嚟講係碎紙，但都係一份心意，唐唐應該收到。
不過，都唔係個個富豪都一窩蜂響應政府支笛o架。華懋集團執行董事及管治委員會主席龔仁心噚日出席旗下酒店開幕時就話，集團暫時未有打算捐錢畀關愛基金，因為華懋本身都有慈善基金，而且集團有官司在身，不便參與喎，真係貫徹應使先使嘅龔家精神。