中山裝是他的標記，雙十節是他的平台，97年回歸夜，任善寧穿上中山裝，在立法局大樓露台外揮手，留下歷史照片，告別僅兩年的議會生涯。兩年後他移民美國，不過留下血脈在香港政壇，近來爆紅的「維園阿哥」、網名「馬草泥」的任亮憲，是他的長子。
馬草泥熱衷社運，在網上很有號召力，但在現實政治圈子，還是老父較有江湖地位。現年62歲的任善寧日前返港度假，適逢雙十節，上周日領着兒子由朝到晚參加雙十活動。馬草泥雖然紅透網絡，但在右派圈子，始終是曾經創立「一二三民主聯盟」的任善寧較有名氣，「我特登帶佢去呢啲活動，一嚟自己去敍舊，二嚟要介紹個仔畀班老友記認識，哈哈。」
時代唔同咗 拖馬易過借火
一向甚少與兒子談政治的任善寧，不諱言對兒子踏足政壇很意外，「以前都唔覺得佢特別有興趣」。馬草泥去年底首度亮相《城市論壇》，任善寧笑言自己後知後覺，「我之後睇報紙先知，原來佢走咗落維園，問佢做乜，佢話因為要講高鐵，所以即刻喺屋企飛落去發表意見」。
兒子忽然從政，任善寧說毫無先兆，「可能細細個聽埋聽埋好多嘢，就算冇出聲，已經對政治產生興趣」。兒子平地一聲雷，曾經滄海的父親既難以置信，也十分羨慕。「好似我自己咁，點會好似佢咁後生就去從政？總係覺得要有經濟基礎，有自己嘅條件先好去。入咗呢個圈子，收入唔穩定，點樣可以維持生活呢？做九龍城區議員時，有時半夜12點收到call，話兩點去示威咯，都好大掙扎，去唔去好呢？我都有公司嘢要處理o架，最初真係唔係好習慣。」
facebook當道，新世紀社運行動在網上一呼百應，上世紀的政客，憶述從前只靠電話「班馬」的年代不無欷歔，「我哋從政時，好難先至動員到好多人，每一位都係自己掘返嚟、call返嚟，點似得家咁，喺網上call一call，啲人直刻標晒落維園，大家仲三唔識七；時代唔同咗，拖馬易過借火」。
「一二三民主聯盟」高峯期共有七個區議員加一個立法局議席，聲勢不遜現時社民連，雖然是旗幟鮮明的親台政黨，但任善寧說，當時與親中政黨關係良好，與現時民主派與建制派劃清界線不同，「嗰時香港面臨回歸，好多未知數，所以我哋要去了解，民建聯甚至西環都要去接觸，問佢哋九七後你哋會點做？冇理由只係一味話反對你」。
討論區留言 上網多過兒子
回歸後政客歸邊，本地右派式微，任善寧舉家在99年移民美國，但一直有留意香港時事，以電郵與朋友隔空論政，又在各大討論區留言，可以說是資深網民，在旁的馬草泥插嘴踢爆老父：「佢上網多過我，去高登討論區多過我，可能有個網名㖭！80後過我好多o架。」
任善寧從政立場鮮明，不過言行溫和，退下來後反而越老越激，他說是受兒子影響，五區公投就是因為兒子不斷游說，令他由反對變成支持。談到政改方案，任善寧終於「嚟料」，滔滔不絕炮轟方案明進實退，質疑昔日戰友讓步，批評火力不比兒子弱。任善寧笑言，不排除有朝一日會以維園阿伯身份殺入《城市論壇》，與兒子唱雙簧。
訪問之日，任善寧再踏足中環，立法局變成立法會，大樓沒變，他憶述「落車」一刻歷歷在目，「當晚心情真係百感交集，因為係香港一個歷史性時刻，大家都唔知道之後嘅香港究竟會點樣走」。時間不會走回頭路，如今兒子也像他一樣踏上政途，任善寧說這次回港，自訂一項特別任務，「我要為阿仔從政問題收風」。
近日他每逢遇上朋友，話題總離不開任亮憲：「通常問吓佢哋點睇呀，佢要做多啲邊方面工作呀，甚至會問西環有冇留意同睇得好實呀？」歸納初步意見，過來人離不開叫任亮憲多做地區工作，這一點，做父親的經驗無限。「我叫佢整個乜區物區觀察社或者關注組出嚟，我嗰時都有個九龍城關注組o架。咁多年嚟，大家都係用緊同一招啫。」時代變了，有些事，任善寧覺得十年如一日，任亮憲又怎樣想呢？
記者 許偉賢