活樂遊1：牧牛湖食大閘蟹　一條龍膏膏膏

上周末，小記專程坐飛機到「馬鞍山」，品嚐現時人氣最強的大閘蟹。地點我無寫錯，你亦無睇錯，此馬鞍山不同彼馬鞍山。此馬鞍山身處安徽，有個現時聲名未及陽澄湖的大閘蟹場「牧牛湖」，來此你能找到大閘蟹一條龍服務，由養殖至將蟹食至粉碎你都可以在這裏做得到。

記者︰吳美美
攝影︰林栢鈞、吳美美
鳴謝︰興隆食品有限公司

湖上蟹實Q睇水

重陽未至，身邊各大哥大姐都話要整餐大閘蟹宴，還說已經食咗隻八両蟹落肚，excuseme，請問咁早真係可以搵到真正足八両大閘蟹嚟食？仲要今年天氣熱咗咁耐……
驅車前往安徽牧牛湖大閘蟹養殖場，這裏總面積達一萬畝，先到佔地三百畝的蟹苗場，只見一個二個水草池，原來水草在生態養殖法起了很重要的角色，因為水中溫度要控制在25-30℃，水草就有散熱及保暖的兩重作用，撈起水草就會見一隻二隻蟹BB（中華絨螯蟹是這裏的單一蟹種），現時的約有五個月大，有如一蚊人民幣硬幣大小，到七個月時就可以移至「成人池」繼續成長。安徽是全國生產最多大閘蟹的地區之一，去年單單出口到香港的就有50噸，運抵日本的更有60噸，日本人對大閘蟹的瘋狂不亞於港人。
一萬畝的養殖場，用腳是行不完的，用船啦！到了湖水較深但依舊勁多水草的「成人池」，我們就轉乘小艇睇捉蟹兼睇水，這個睇水有兩重意義，第一，因面積太大，怕有蟹賊光顧，於是派出「湖上蟹實Q」，佢哋每晚住在舟中，咪以為好寫意，伯伯話蚊多到暈，入面又細又窄，轉個身都怕翻艇。第二，是睇湖水，牧牛湖湖水屬活水，污染度相對較低，我們拎個膠樽裝水睇睇，單憑肉眼觀察，又真係幾清（內地水遠睇你都知幾黃……），食時都安心啲。

■蟹BB都有攻擊性，你睇蟹腳幾尖。

■呢排屋就係蟹實Q的居所。

■捉蟹最好在夜間進行，日落時去捉都未夠多。

■食評家劉健威先生應該好鍾意食蟹，你睇佢幾開心。

五両金黃已夠嘆

聽完以上一大餐，蟹癮難耐，還是開動胃酸，擦餐大閘蟹宴，蟹場主人Eric為我們安排了一頓大閘蟹crossover農家私房菜，今次我們品嚐的蟹是約五両，一籮63隻的，主人家先小人後君子講到，重陽前，蟹其實未完全成熟，肉身及膏方面都稍遜，聽完拎上手再轉身，蟹腳特別尖長，因養殖過程是放養，令蟹有很多走動機會，與泥身磨擦……講多無謂，揭開蟹蓋睇睇內裏蟹膏情況如何，雖未至於澎湃但已夠嘆，色澤又金黃，難道飼養時食得多粟米同南瓜多有幫助？唯一缺點，蟹黃有少許苦味，俾Eric言中，未當季味道都係爭少少，但他就好有信心講：「11月時牧牛湖的蟹味道一定贏太湖陽澄湖！」至於配角的農家菜，味道都屬中上等，最推介是「魚蒸蛋」，蛋滑嫩，吸了魚汁，有清清的鮮甜味，送飯一流！

■原來呢款魚叫「錦濤魚」，全因當年胡總鍾意食。

■無一個粉絲見到呢盆蟹唔會大叫！

■劉生話最多都係一次食三隻，算忍得口。

■八年陳花雕$120（興隆獨家發售）

■雖然未十足成熟，但蟹黃已經幾澎湃。

■魚湯蒸蛋，蛋身嫩到呢！

3日2夜蟹團：

不好意思，以上行程乃屬私人性質，要一嚐的話恐怕……好彩主人家說，10月23-25日及11月12-14日，將會搞兩團3日2夜大閘蟹之旅，與以上行程相若的「蟹團」，每位盛惠$4,399（全包宴，包括來回機票、酒店住宿、兩餐任食大閘蟹等），查詢︰25415072（興隆食品）

a.馬鞍山牧牛湖水產品有限公司
地址︰安徽馬鞍山市當塗縣石橋鎮

烤鞋底送酒一流！

要食野生魚，香港已等同絕望，有機會回內地，當然盡情地吃。采石第一樓可說是馬鞍山裝潢最為骨子的酒樓。這裏吃的最著名是魚，我們也就叫了幾道「江魚」，屬長江中下游一帶。皖菜重色，紅燒是其中對應的做法，一道紅燒紅鯽魚，色澤賣相幾吸引，加有少許辣味，肉身幾滑又啖啖肉，不怕有泥味。有道菜個名我好鍾意，叫「大烤草鞋底」，即是龍脷魚，炸至表面脆身但內裏唔會完全無晒水份，配酒又是一流。奇味江囗魚，基本上我真係好唔鍾意呢條魚個樣，唔通因為咁，大廚就用好多蒜頭煮呢味魚，務求見唔到佢個樣？當然不是，用蒜是要帶出魚的鮮味，好易食咗大半條。
題外話，當塗縣與李白有好大關係，因他是在這裏百年歸老的，所以有很多他的相關物，例如有支采石磯白酒，就用李白個body做酒樽。

■大烤草鞋底$80/斤

■李白造型的采石磯白酒。

■紅燒紅鯽魚$80/斤

■奇味江囗魚$91/份

■呢位馬鞍山小姐都好怕醜，影完相面都紅晒。

b.采石第一樓
地址︰安徽馬鞍山市當塗縣采石唐賢街47-49號

辣油浸豬手　標汗!

一樣食物是否好食，一次點可作準。所以我繼續搵皖菜試試味。吃重量級菜式時，經常會先出現六小碟，這裏我就試了臭豆腐及滷豬手，前者不至大臭而帶有豆味，後者肉質較乾不似香港式的超腍豬手。再來的還是豬手，「木桶豬手」基本上是辣油浸豬手，入口微辣卻足夠標汗，肉身亦已浸至腍身，是可以一嚿接一嚿咁食。要說那道老鴨湯，完整一隻鴨擺落去煲，味道點會唔夠甜，唯一缺點是隻鴨有點肥，所以喝湯前要先「撇」油。