"忍得到慳過千蚊"
雖然冇畸寶，仲有大把窿路睇波；但係諗起今個冬季可能會好凍，到時周中深夜縮喺屋企有高清英超歐聯波睇就最爽。不得不趁國際賽期放幾日假，的起心肝搞掂佢；哈哈，街邊檔sales梗賣口乖讚我忍得，其實我心諗，佢哋出新廣告劈價每月減幾十皮我至肯申請，忍一個月，兩年合約慳成千幾蚊，雖然安裝麻煩又要用微波傳送，但上門嗰兩位阿叔好幫得手，好有禮貌，抵讚！
"橙兵新希望阿費利"
周中捧「現在」場睇國際賽直播，至愛荷蘭出場，眼瞓都要睇喇；重心捧荷蘭[-1]，因為隊波冇咗正在養傷中、但冇大作用嘅尹佩斯，又因為瑞典有個唔鍾意踢太公波、又係鼎鼎大名嘅伊巴，結果班荷蘭中前場生牯仔打到識飛，尤其睇住佢不斷成長、燕豪芬中場阿費利。傳聞佢唔肯同燕軍續約，明夏回復自由身，24歲仔大熟大勇，練大隻啲到時奔向英超啱數；法比仔要走，雲格有興趣就快，利記曼聯正虎視眈眈。
"個個係股神仍博大冷黑池"
銀紙唔值錢，股市勢如虹，最啱啲短炒客，你叫人放中長線，真係有幾多人會肯聽；家個個都係股神，揀啱當炒版塊，邊個冧巴都有得贏。不過有時同賭波心態一樣，睇啱目標，就要長期跟進，贏盡佢。要玩冷門，再博同我有緣嘅黑池，長線必被忽視，英超最冇財力冇名氣球隊明日迎戰億萬大軍曼城，後者國際賽後，球星們唔易咁快集中精神打出高水平，防線傷兵亦多；再博5.5倍大冷主W再加入球「大」，有勇氣球隊，怕乜同你班貴價兵鬥攻！
"紅軍太衰走地觀望"
馬會仲狠過梳打埠，開出周日愛華頓讓紅軍，你話幾耐未見過利記喺打吡戰俾人睇得咁淡；球星又輪流傷主力又傳跳船，話事權未傾得掂，呢場波冇得博命，我建議走地至算。另外兩個板塊日聯同巴甲，喺國際賽期間都有波打（日本踢盃仔），打得太密，戰果易反常，尤其條鯨魚仔喺聯賽已經彈開晒，今周作客唔差嘅天鵝賠率乏味，唔買；不如冷吼櫻花。
"貝碧唞夠做上盤救星"
賭國際賽真係一路放幾日假一路hea住玩，不過今周起又唔同，屋企有英超歐聯睇，收咗工會投入好多，本來熱門一早諗住今晚阿仙奴同曼聯[-1]互串做重心，但係噚日先知道法比仔唔踢得，雖然替身韋舒亞周中冇為大國腳上場，但係始終唔放心大注；不如重心博迎西布朗嘅曼聯，老將「雙斯」休息咗十幾日，早退出國家隊嘅貝碧托夫弗爆，加上西布朗已曝光，魔將應該唔會輕敵；加上周三歐聯只迎土耳其嗰班散「沙」，費Sir肯定落柯打要眾主力今晚博命。波膽博4:0、4:1！
語錄：不用理會國際賽後列強多唔掂等表面數據；分析球賽，最重要掌握每隊軍情同打法推敲，咁樣，波，就會更好玩！