醫管局首個老外行政總裁蘇利民今年6月辭職，今日正式結束四年香港之旅，返老家澳洲定居布里斯本。歸心似箭嘅蘇利民話自己嘅未了心願係縮短病人輪候時間，同醫護人員唔需要過長時間工作。佢提醒繼任人要繼續同員工溝通，唔好齋聽，而係要切實執行喎。
暫未有新行政總裁
蘇利民噚日連走幾場告別宴，同記者行家茶敍時，話回想起第一日同老婆嚟香港，大班記者喺機場等佢；為咗唔好失禮人，落機後佢專登打番條呔，着番件西裝，點知有記者問佢點解坐咁多個鐘頭機都打呔。但佢聽極唔明，人哋講呔（tie），佢老婆就提佢話記者問你係唔係好攰（tired），牛頭唔搭馬嘴，諗番都好笑。
蘇利民又話，初嚟甫到嘅時候，已經有人提佢香港記者無處不在，有次有記者打電話去佢屋企，好在佢一早教個女點應付，結果個女話冇呢個人就收線，但自此之後個女學識講大話。有次蘇利民媽咪嚟香港後唔舒服入院，佢冇即時幫阿媽找數嘅消息成為新聞，第二日居然有的士司機認得佢，仲問候佢何媽好番未，令佢好感動。
蘇利民話，已為回家作好準備，買咗有泳池嘅大屋。蘇利民走咗，但醫管局仍未有新行政總裁，暫時會由財務總監謝秀玲頂住先。