江若琳（Elanne）早前跟楊丞琳（Rainie）到泰國拍攝3D鬼片《童眼》，雖然開工首日二人只是初次見面，不過卻已話題不絕：「我同Rainie好似相逢恨晚咁，乜都講得一餐，可能因為我哋性格、喜好各方面都好似，唯一唔同嘅就係佢鍾意靚仔而我就唔係，所以我哋一定唔會爭男朋友！」Elanne笑說。
回憶拍攝點滴，Elanne自爆瘀事：「有次同Rainie去飲嘢飲到好晏，第二朝又要好早開工，所以我冇化妝、頭髮又紮啲唔紮啲咁落樓，結果Rainie見到就話我喺佢心目中嘅靚女形象冇晒，件事仲笑到家！」除了形象盡毀，她更在泰國外景之行意外地增磅：「唔知點解，去到當地我係咁食唔停口，食到大家都叫我唔好再食，要我減肥，之前去威尼斯，Rainie見到我第一句就問我係咪仲咁大食，真係好瘀。」
羅志祥驚喜慶生
雖然被取笑，不過Elanne指Rainie亦有窩心一面，好像在她剛過去的生日，這位好友就為她炮製了一個驚喜：「踏正十二點我收到個電話，有個男仔同我唱生日歌，原來當時Rainie同小豬（羅志祥）拍緊劇，佢知我好鍾意小豬，所以特登叫小豬打嚟唱生日歌畀我聽，真係好感動！」問到視羅志祥為偶像的Elanne，可會要求公司開戲跟對方合作？她即甜笑謂：「最好係純愛情片，仲要去北海道取景，我唔介意自資出機票！至於kiss戲，就導演話事啦！」
拍檔被鬼樣嚇親
Elanne在戲中還有幾個死黨，首拍鬼片的何浚尉（Rex），則指在《童》片中演得未夠盡興：「因為我喺戲入面好早俾人捉咗，所以尖叫嘅反應都係啲女仔負責晒，其實我好想試吓飾演鬼怪化鬼妝去嚇人。」同場的林司敏（Ciwi）則指拍攝時被自己的鬼妝嚇倒：「當時我戴住白色隱形眼鏡，睇唔到自己化好妝之後係乜樣，所以拍完除con時真係嚇親！」
採訪：譚倩宜
攝影：黃文偉
服裝：MissSixty（江若琳）、Initial（何浚尉）