市建局同南豐合作嘅灣仔新盤Queen'sCube貴到飛起，一個實用面積唔夠280呎嘅蚊型單位，要賣近600萬元，呎價高達2.14萬，如此癲價，連煲呔都睇唔過眼，事關佢喺施政報告中猛批樓價貴，推出「置安心」計劃畀夾心階層易啲上車，擺明唔妥發展商。
聲稱冇減價空間
佢老人家噚日在立法會答問大會，好激動咁話「置安心」嘅樓一定唔會起到Queen'sCube咁，又話嗰啲樓係有錢人住嘅，對市建局好有意見。
市建局話晒受過政府注資100億元恩惠，見到老細咁嬲當然要解釋一下。
主席張震遠話家有唔少youngsingleprofessional想買樓，所以Queen'sCube唔憂賣，又話價錢由市場決定，家冇減價空間。市建局發言人補充，指灣仔唔少新樓都係差唔多價，以太古星街「5StarStreet」為例，實用率只有六成，建築面積呎價都要1.8萬至2萬蚊喎。
八方覺得講多無謂，有價有市最實際，張主席點睇？