今天開始一連4日召開第十七屆五中全會，投資者明知道資金理應聚焦「新興產業」相關股份，只是美元跌勢過急，煤炭、黃金、有色金屬等資源板塊有如擁有金剛不壞之身，新能源股要接力都要等到開會前夕最後一刻。
然而太早行動嘅先行者，如一拖（038）就反高潮，太陽能、燃氣及核能真係等到花兒也謝了才發力，希望隨人民幣升值及通脹預期持續發酵，下周公佈之經濟運行數據將再接力成為焦點。
市場情緒開始變得敏感，淡友殺個遍體鱗傷後仍未肯罷休。
跌破10日線隨時止賺
美國現時採取過度寬鬆的貨幣政策風險在於輪流不問估值，挾倉力量為市場製造恐慌性追貨效應，大家都在玩心理遊戲，與其四圍問阿貴咩位買、沽、止蝕及止賺，倒不如用番炒港股直通車策略，未揸貨嘅待回見10日線或者稍回補裂口就當調整買入，已揸貨者待股價飄揚跌穿10日線就止賺，10日線已經係上升軌支持指標，穿得上升軌就隨時預備止賺。還記得09年7月恒指20000時，四叔曾經話過每升1000點減持1成持貨，升至25000時就會停止沽貨，餘下股票長期持有，當時美滙指數還在80水平爭持。唔知現時四叔策略會否有變，變就代表靈活，唔變就代表有紀律，兩面都咁好睇。
當你發覺最鍾意去嘅泰國都不再便宜，韓圜唔夠1個月升近1成，連澳洲紙都就嚟貴過美金，歐元都俾弱美元搞到貴晒。弱美元搞到世界大亂，即將在首爾舉行之20國集團峯會矛頭更應指向美國，只係邊個咁有「吉屎」大聲聲討美國又係另一回事。典型恃大行兇，日本發窮惡為顯示對美國效忠及首相為爭取民望，擺明對中國及韓國玩針對。
投資者自求多福，只有苦等美元滙價掉頭，當其他尤其新興市場貨幣回軟之時，才是股市玩完之日，國策當然係炒作題材指標，但係滙市變化才是繼唔繼續在股市打滾之超級訊號，假如債息被壓至目標利率，市場隨時現物極必反。
胡孟青
作者為獨立股評人