近排各大小公司都趁空檔搞記者採訪團，令華華又有機會做「trip精」。上個禮拜，華華就有幸嚟番個3日兩夜莫斯科之旅，採訪一個投資論壇。著名嘅紅場就唔得閒睇，最令華華印象深刻嘅，係去到邊都好似好迷惘咁！
先講第一謎，俄國政府一路希望將莫斯科打造成國際金融中心，但係照華華觀察，莫斯科要做金融中心，應該仲有排，事關成個城市咁大，英文標誌指示極少！莫講話莫斯科街頭、餐廳無英文指示牌，就連應該係最文明嘅國際機場，英文字竟然仲係好似稀有動物咁，搵隻睇吓都難！而對於唔懂俄文嘅華華嚟講，無論去到邊，都係咁迷惘！
至於第二謎，就係俄國人工作態度同作風，尤其係佢哋嘅時間觀念！投資論壇嘅開始時間相當隨意，約好做訪問，受訪者又永遠都唔見人……呢個trip，絕對係一個「謎」團！