楊千嬅與林峯在01年合作電視劇《美味情緣》飾演情侶，９年後在電影《抱抱俏佳人》再續前緣，飾演weddingplanner的千嬅與林峯發展姊弟戀大團圓結局，與千嬅現實中的感情生活不謀而合，曾被視作敗犬的千嬅直言最憎剩女這名字，覺得無聊兼戇居。
楊千嬅日前在尖沙嘴接受訪問時，笑指電影《抱抱俏佳人》中的人物與她有幾分相似，她笑說：「背景有少少似，我初初睇劇本都覺得好吸引，不過我好憎話人係『剩女』，我覺得好無聊兼勁戇居，一啲都唔公平，家好有條件有能力嘅女人，佢哋唔知道同唔肯定究竟想要啲乜嘢，好多嘢都好猶豫，後生嗰陣都仲可以出去博，但年紀大咗就乜都唔敢試，怕受傷害後冇咁嘅力氣去復原，所以寧願喺工作上去博而放棄愛情，咁唔代表佢哋失敗，要糾正呢個價值觀。」
深愛願意付出
心口有個勇字的楊千嬅，原來都有沒信心的時候，她說：「我以前會覺得藝人要經營一段感情係有好大障礙，更加唔會諗家庭計劃，所以一直以嚟我都冇諗過嫁，但原來只要你好鍾意一個人，一定有你嘅方法，就算得15分鐘都會想去見吓面，只係睇你鍾唔鍾意佢，同願唔願意付出咁簡單。」
千嬅更坦言因為老公丁子高的出現，令她重新認識自己：「佢（丁子高）令我知道楊千嬅係邊種性格，令我搵番同了解自己多咗，我以前係唔知自己想要乜嘢，總之有嘢咪做咗先囉，又或者做乜都係贏咗先，雖然贏咗唔一定可以滿足自己個心，但係唔贏就一定冇安全感，不過家我好清醒知道將來想要啲乜嘢，知道條路應該點樣行。」
學習保鮮感情
踏入人生另一階段，千嬅表示結婚後是第二個學習階段，她說：「結得婚梗係想長久，所以要諗方法點樣去將呢段感情保鮮，要接受由激情變做一個伴呢個係事實，如果你接受到咪唔會有七年之癢。」
採訪：何慧斯
攝影：陳順禎
服裝提供：HarveyNichols
場地提供：馬哥孛羅香港酒店
