根據我哋偉大嘅曾特首所講，復建居屋可能又會製造大量負資產，唔少香港市民都俾佢拋窒；但係華華就覺得，佢有咁嘅諗法，若果唔係五官閉塞，就可能係嚟自火星囉！事關居屋其實可以幫唔少人累積財富，唔係吹水，華華係有據可依嘅！
好似居屋樓王之一嘅慈愛苑咁，就有一位隱形富豪，啱啱掟咗906.8萬，買咗個熱炒嘅尖沙嘴凱旋門2座中層F單位，面積562方呎，呎價超過1.61萬！聽講仲諗住自用喎。至於佢家住緊嘅慈愛苑單位，係喺97年以125萬一手買入，市值家升到195萬，由此可見，住居屋呢十幾年，可以幫佢累積到幾多財富！
咁大家或者會話呢啲例子唔多，不過華華聽啲經紀朋友講，居屋業主買得起幾百萬私樓嘅大有人在，所以煲呔同佢嘅心戰室團隊，下次諗口號，記得checkcheck民情先喇！
李華華