睇完《理財版》比較政府推出嘅醫療保險同市面上現有嘅醫療保險，敏妮問慳妹，「政府嘅醫保，係咪所有冇買保險嘅老人家都受保？」
話說之前敏妮同慳妹有個如意算盤係咁嘅：既然全民皆保，家陣有僱主提供嘅醫療保險，咁自己咪唔使買住，到日後唔做，或冇得做，先至自掏腰包買政府嘅自願醫保。
政府醫保 有一年抵壘時間
慳妹話：「政府嘅醫保，有一年『抵壘』時間，呢一年投保，之前有過嘅病、老人家，全民皆保。不過，蘇州過後無艇搭。」換言之，敏妮同慳妹之前打嘅如意算盤就唔係幾響！
不過，喺咁多種保險中，醫療保險好重要，有必要買，敏妮就有親身感受。呢個禮拜，敏妮都喺私家醫院度過，病房、醫生治療、手術，連午餐晚飯都係中上價錢，如果敏妮唔係有公司提供嘅保險，再加自己額外買嘅醫療保險，相信住一日就要計一日，究竟要沽幾多手滙控（005），或者使唔使趁高沽咗儲埋嘅港交所（388）先夠錢埋單，點會住得咁安心。
公司有醫保 也宜自行購買
其實之前都有朋友問過敏妮，公司都有提供醫療保險，使唔使自己掏腰包買多份。
未嫁得去嘅敏妮有另一個諗法，既然現時冇乜家庭嘅負擔，暫時亦唔見得除咗自己之外，可以成為任何人嘅負擔，當然，亦唔希望成為社會嘅負擔，所以最好嘅方法，就係為自己做多一點。
住私家醫院除咗有較好治療、較舒適環境，亦唔會加重公共醫療系統負荷，自己得益，對社會亦有貢獻。
溫敏妮
http://wanmanli.com/blogs/