地產商示範單位得個樣，博大霧誤導準買家，原來民建聯副主席張國鈞都幾乎中招，佢噚日喺港大論壇透露，幾年前睇過港島一個所謂豪宅示範單位，睇廣告好吸引，參觀示範單位時好彩保持頭腦一點清醒，睇落點解個客廳咁大嘅？原來發展商用透明膠板當作廳房之間嘅間隔牆，製造視覺假象，「個廳其實細好多，坐喺度唔使遙控，用腳都可以熄電視。」
去年佢睇中一個九龍新盤，開賣前經紀call佢睇樓，點知企到半夜，發展商先開盤，佢排隊到凌晨兩點先有得揀樓，「但坐低就只可以揀28樓A、B、C、D單位，全部過千呎。」畀錢買樓都冇得揀，佢話嬲到即時起身走人，身旁經紀見財化水，即時黑面。佢話父母都係居屋受惠者，政府推出「置安心」化簡為繁，復建居屋最實際，佢同老婆現時租樓住，未有置業，「置安心」唔使預佢。