一場金融海嘯，搞到銀行唔再做貿易融資，全球貿易幾乎停頓，幾經辛苦捱過困難時期，殊不知就殺出新銀行監管規例《巴塞爾資本協定III》，莫講話做出入口貿易生意仔嗰班中小企嚇到腳軟，就連我哋「港產經營之神」、利豐（494）老闆馮國經都話怕怕，而佢打算喺11月首爾舉行嘅G20會議上「呻吓」訴苦!
參與出書寫總結篇
老馮話，新規例將銀行嘅貿易融資業務，擺喺等同衍生金融產品嘅高風險欄內，銀行如果做貿易融資生意就要有25%嘅資本金，咁即係叫銀行做少啲貿易融資生意啫，所以有啲擔心，佢驚全球貿易再次收縮……
講開老馮，佢最近參與出版咗一本書，書名叫「PeaceAndProsperityThroughWorldTrade」（透過環球貿易促進世界和平同繁榮），呢本書係由擁有逾120個國家商會組成嘅國際商會（ICC）出版，老馮係呢個會名譽會長，佢負責壓軸寫總結篇。
老馮話，環球貿易嘅未來發展，唔單止淨係以前咁，以促進經濟發展為目標，仲要以創造就業為目標，先可以為世界帶嚟和平同繁榮。金融海嘯已經令全球增加多2億人處於長期營養不良，令總數增至10億人，仲有，呢10年估計發展中國家會有12億人口進入城市尋求發展機會，如果唔提供足夠嘅工作，將會有更多城市出現貧民窟，帶嚟社會危機……照咁講，利豐係咪應該創造更多就業機會藉以締造世界和平呢又？
李華華
mailto:[email protected]