電影《精武風雲．陳真》嘅「中華英雄」陳真打到日本仔狗血淋頭，周二晚中國男籃喺對巴西嘅友賽，亦都「陳真上身」，拳打腳踢巴西球員，將巴西隊嚇到大叫走人。
呢件事令我求大俠諗起當年國奧隊喺英國友賽昆士柏流浪，郜林亦喺足球場一個打十個，事後公開道歉之餘，更被趕返國冇得來港比賽。今次國籃就執返身彩喇，因為中國籃協對處分隻字不提，只係話班球員要上德育補課喎。
陳真名句「中國人唔係東亞病夫」真係影響深遠，故此國籃、國足奧運隊近年都有同「洋鬼子」打鬥事件（見附表）；07年國奧隊嘅郜林面對昆士柏流浪球員一個打十個，至今仍然堪稱經典！今次表演「中華武術」博大精深一面嘅，就變咗係中國男籃。
事緣國籃同巴西隊喺河南許昌進行第3場友賽，首兩場雙方各勝一場，周二晚進行最後一戰時，國籃後衞張慶鵬開賽後遭巴西球員擊打後腦離場，使雙方氣氛頓變緊張，更不斷出現粗野單擋、犯規，令個個國籃球員都怒髮衝冠。
率先「為國爭光」嘅係出名火爆嘅前鋒朱芳雨，佢喺首節剩餘1分06秒雙方爭球出界後，使出一招「雙龍出海」雙手大力推跌巴西球員，之後更上前挑釁，終引發雙方球員打鬥。蘇偉先以咬牙切齒以鐵拳出擊，繼而勇字當頭嘅朱芳雨仲不斷追打一名巴西球員，更使出狠絕嘅膝撞，嚇到巴西要拉隊離場。
派員道歉就算
國籃呢次「為國爭光」，簡直令世界籃壇嘩然。點知中國籃協噚日喺記者會上，只係表示籃協會對事件負責，會再次派員向巴西隊道歉，而暫時處分只係停止訓練，要等同國際籃協溝通完，先會喺亞運前公佈正式罰則。
打波唔叻唔緊要，冇品到吓吓都講手就真係要不得，雖然遠在美國嘅易建聯喺微博力撐國籃，話外界要冷靜睇呢件事，但我求大俠覺得今次點都要重罰肇事者，咪搞到第日個個中國運動員都亂咁打人先得o架！