今年施政報告封面用咗一隻曖昧顏色，八方驟眼睇覺得係泥黃色，官僚習慣指鹿為馬，形容係「太陽橙」色，即係類似新奇士橙嗰隻色水。
老董用過呢隻色
前任特首老董03年份施政報告，亦用過呢種橙色，官府人士解釋，選擇「太陽橙」色，係要象徵施政重點為香港帶來活力，而多項扶貧措施，希望基層市民感受到社會同政府關懷佢哋嘅溫暖，顯示香港係一個有溫情、仁愛嘅地方。
愛玩襯色嘅煲呔噚日戴上橙色煲呔去立法會宣讀施政報告，特首夫人鮑笑薇亦着件橙色衫襯到絕。煲呔下月中會去日本出席亞太經合會議，順道到橫濱考察焚化爐同處理廢物設施，家陣日本籠罩反華情緒，中日官方、民間交流都受影響，煲呔訪問行程唔知會否受影響。唔少官員、議員都去過日本睇焚化爐，煲呔反而未去過考察，因此今次因利乘便，係唔係真係區區都有個焚化爐呢？去完日本可能有答案。