預告今年施政報告篇幅較長嘅煲呔，果然無吹水，新鮮出爐施政報告共有171段，噚日無人掟蕉掃場，煲呔一氣呵成都花咗約90分鐘先讀完，據講佢事前在禮賓府由頭到尾讀咗三次，花咁多口水同時間練習，讀到佢聲到沙埋，因此噚日頻頻咳嗽。
雖然煲呔誠意十足畀心機練習，可惜好多人唔領情，老友李國寶可能早一晚有應酬，率先閉目養神，唔騷擾煲呔。行會成員梁智鴻則擺出沉睡姿勢，由於佢可能默默思考施政報告內容，因此無人打擾佢。
教育局局長孫明揚為官幾十年，聽施政報告多過八方睇電視劇，年復一年要佢聽高大空施政報告，確係不太人道做法，因此佢瞌一瞌，無可厚非。在場仲有好多人都閉目養神，包括黃宜弘、劉兆佳。