昨日講到食家L之「留家廚房」一樓私房廳牆上，掛上黃永玉一幅傑作《爭蟲圖》，畫內有兩隻小蟲互啄，似乎爭持不下。兩條蟲仔打交，有何意思？睇吓黃翁題字，便知一二。左丁山拿出iPhone將題字影下，返到屋企，逐行字放大，抄低，再用短訊送過去俾食家L核對，食家L立即回覆：「啱晒。」呢首黃永玉打油詩曰：
「爭蟲冇謂兩頭牽，風雨如晦走千官，馬騮散晒樹唔倒，豬仔未賣船已翻；嚐新抖擻去北京，懷舊依然去台灣，剩返幾粒古惑仔，諗住契婆英格蘭。」下書：「癸酉感書，八旬打油，黃永玉」。癸酉年便是一九九三年，十七年前咯，當時香港回歸中國嘅大局已定，本地社會上不少人要為九七後打算，移民無日無之，不移民嘅達官貴人大概有兩大類，一是走上北京爭取串門子，搵新關係，搖身一變成為新愛國人士；一係戀棧即將過氣嘅事頭婆，當然有極少數去咗台灣嘅。經食家L點醒，「爭蟲」係另有所指，諧音啫；哦，即係「爭寵」咁嘅意思，上北京爭寵吖嘛！
星期日跑馬，廂房內碰到Q大姐，同佢講起「留家廚房」之國泰飛機餐，Q大姐立即講書：「嗱，我地公司做過好多好多研究，請晒專家俾意見，發覺我地在地面上與在高空雲層之上吃餐，味覺有所不同，所以調味時要有調整，譬如一碗湯在地面炮製，要比正常鹹度高少少，上到天空後，就覺得啱啱好，唔覺得鹹，唔駛落鹽，在天空上嘅餐飲，係冇地面上咁原汁原味嘅，點都有三成折扣，我地國泰盡量做到差別在三成或以下，已經係最好嘅嘞。」跟住Q大姐問左丁山攞貼士，買邊隻馬，但自己聽完佢講飛機餐飲，已經唔記得邊隻馬打邊隻馬，係咁意噏咗隻十二號，但唔記得係二場十二號吖還是三場十二號咯，第二場十二號係「上浦駿將」，爆出二十倍冷門，第三場十二號「愛拼者贏」力拼之下，只能跑個第五，輸晒，兩者有打邊爐與打屁股之別。