計劃呢個月6盤齊發嘅恒大地產（3333），竟然隨時有成12億元擺入個銀行戶口等賠畀大孖沙，堪稱得上係上等人也，果然有借有還仲要肯對賭兼「還突」，賭場投行大孖沙最鍾意呢類客，賭性強唔囉嗦，總之佢越等錢使就越勤力賣樓，買家明知佢水緊，分分鐘有價講。
恒大公佈首9個月銷售額達356億元人民幣，已達全年400億元人民幣目標的89%，達標情況樂觀，股價更可觀，皆因大孖沙其中一項入股條件，係平均股價要在5月至11月之間維持在3.50元之上，對賭已好明顯無法達標，之不過假如真係可以咁穩定，仲要係宏調來勢洶洶之際，神仙都企唔穩之時，點頂住個價都成問題啦！夾硬頂住除非玩操縱股價啦，不過玩到咁大好危險，所以跟投行加大戶對賭，隨時真係賠了夫人又折兵，佢哋為咗呢額外12億元共同利益，要壓住個價反而話都無咁易。睇住嚟，過咗呢一關，3.50元隨時唔再係阻力。
不平等條約又豈止恒大一家，今年首9個月累計實現合約銷售收入同比增長102%的佳兆業（1638），今年中就曾發行3.50億美元的2015年到期13.5%優先票據。
投行肥水不流別人田
大家唔會發現嘅係，原來咁好回報嘅投資，大部份係投行自己食晒，擺明肥水不流別人田，結果人家寧願揸票據唔揸股票，隻股因為咁樣無表現。至於公司截至6月底止手頭現金24.79億元，資產負債比只有19%嘅寶龍地產（1238），上月亦發行咗於2015年到期本金總額2億美元之優先票據，取得淨額1.948億美元，票據利息按年利率13.75%計算，每半年支付一次。
大家會發現實力背景雄厚如中國海外發展（688）舊年就選擇供股，而今年就有越秀地產（123）供股，大股東負責包銷，明顯對自己充滿信心。佢哋都公佈咗今年首9個月累計合同銷售面積及銷售金額已分別完成全年目標之77%及86%。所以話，發債無罪，供股有理，前者係明俾大行搵笨，後者則係明知好嘢唔益外人，所以股價齊齊發圍。
胡孟青
作者為獨立股評人