畢菲特喺股壇，有名你叫「股神」，神級功力毋庸置疑，但喺滙市，自從佢老哥係06年沽美元輸鑊甘之後，即時多咗個身份—「滙市燈神」，之但係你有你哋笑，小小挫折無損佢再次指點眾生嘅雅興，繼續「燈神」上身！
「燈神」話，歐元經歷咗歐洲主權危機後，今年第三季嘭嘭聲升番11%，創八年嚟最勁單季升幅，但危機「未解除」，歐元急升後，家先面對真正嘅風險喎！
不涉足 只隔岸觀火
此話何解？「燈神」話，雖然歐盟早前推出7500億歐元拯救方案，避免區內爆發主權債務危機，但呢啲措施治標唔治本，無解決到區內各成員國文化財政政策各異嘅死結，加上歐元家陣升到㷫烚烚，好戲應該在後頭，但佢呢次只會隔岸觀火，唔會落場喇！華華估計，可能同佢嘅「童年陰影」有關……
話說「燈神」02年處男下海炒滙，當時佢覺得美國貿赤有擴大趨勢，於是就買咗大量美元淡倉遠期合約。05年6月，佢透過投資旗艦巴郡所持嘅合約，就達215億美元，點知咁啱遇着聯儲局加息周期，將利率由04年嘅1厘，兩年內加到5.25厘，搞到美元好似食咗偉哥咁，不能軟下來！「燈神」惟有不斷斬倉，手上嘅外滙遠期合約至06年9月，只剩11億美元，埋單計落，單係05年，佢喺滙市蝕咗9.55億美元，就算唔志在都勁無面喇！
李華華
mailto:[email protected]