正所謂人不為己，天誅地滅，為咗增加自己國家嘅競爭力，各國家或明或暗咁質低本國貨幣已經係不爭嘅事實。
而喺呢次貨幣戰中，大佬級嘅強國─中國、美國，不停咁互插，至於一直喺電子產品出口上爭餐飽嘅日本同南韓，亦終於忍唔住爆口水戰，插對方干預貨幣唔啱！
日本財務大臣野田佳彥率先發難，喺日本國會度篤南韓佬背脊，話貨幣爭相貶值將會成為二十國集團（G20）峯會嘅焦點議題，南韓身為會議東道主，竟公然出手遏止南韓圜升值，言下之意，即係話南韓干預市場，唔配做峯會主辦國啦！
南韓財政部雖然無直接回應野田嘅評論，但就話自己無干預韓圜升值，只係唔想滙市出現過份波動喎！佢嘅官方解釋同日本之前干預市場時嘅回應一模一樣，似乎寸緊對方「有口話人無口話自己」咁噃。
李華華