嘩嘩嘩，一班香港欖球仔做咩「賣肉」變身「月曆男郎」？大家唔好誤會，其實佢哋今次犧牲色相係為咗幫人，一毫子都唔收o架。事緣一名18歲欖球小子BenKende，兩個月前代表香港U20喺泰國打15人賽，不幸傷咗頸項，家仲要留醫；一名欖球圈有心人SemiIafeta就忽發奇想，精挑細選咗本港12個欖球代表，包括前亞運代表袁健濠、現役嘅王俊喬、姚錦成、基夫（中）等拍咗呢輯2011月曆照，大騷胸肌，月曆今個月27號開賣，首刊2,000本，每本120蚊，全數用作阿Ben嘅醫藥費。
今次個光豬壯舉，都算創咗香港體壇先河，仲去到香港人流最多嘅銅鑼灣、中環、灣仔取景，Semi話已經有唔少內部認購，下一步就會幫女子隊拍，初步構思係着泳衣打欖球，大家記住睇實啦！