港股噚日反覆下跌85點收市，報收23121，中段好淡雙方互有攻守，日股跌得急唔係港股下跌嘅原因，事關內地股市仲維持強勢，隔晚花旗股市亦靠穩，至於官地拍賣就更加創出新高價，賣地之後港股回係借勢，因為今日特首會公佈新一份施政報告，焦點會係樓市，預計特首會公佈一啲資助市民買樓嘅措施，但進一步大力壓抑樓市嘅措施應該唔會有，港股今日掉頭炒番上嘅機會較大。
東風C輪25165：東風集團（489）噚日報收16.34元，升2.7%。股價由9月開始展開新一輪升浪，上禮拜見過17.28元高位，跟住回試10日線，只係整固幾日又掉頭回升，噚日上升有大成交配合，今次炒上睇20元，可以諗吓隻C輪25165。
隻輪現價32仙，2011年4月21日到期，行使價14.90元，溢價10.8%，引伸波幅53.1%，槓桿率5.1倍（有效3.4倍），正股升上20元，25165睇59.7仙，正股跌穿15.20元就沽咗隻輪。
俊樺