「滙豐慈善高爾夫球日」又嚟喇！滙豐噚日為呢個已經第三年喺香港舉行嘅盛事搞記招，做善事嘅嘢，連天公都造美，俾火熱嘅太陽蒲頭，普照大家嘅善心……卒之，主禮嘅滙豐亞太區行政總裁王冬勝同埋樂壇四大天王之一嘅郭富城都出晒汗，之不過城城就有人擔遮、印汗，而有「銀行界梁朝偉」美譽嘅王冬勝就要自己搵紙巾抹汗……論排場，冬冬俾城城「KO」咗！
雖則無人抹汗，但係無損「銀行界梁朝偉」一貫對傳媒嘅風度同體貼，臨出場前，佢仲叮囑記者要飲多啲水，以免焗親，呢頭講完，嗰頭就有工作人員拎啲水出嚟，窩心程度絕對係100分……呢個回合冬冬反勝！
講番個活動，今趟成功為聯合國兒童基金會籌到150萬元，推廣區內普及基礎教育，冬冬噚日下晝仲身體力行參加比賽，佢好謙咁話：「平常心啦，我高球好水皮o架，會盡力，最緊要係做善事。」查實冬冬球技OKo架，噚日只得佢嗰組成功一桿入洞，又點會係水皮呢！
李華華