眼疾嚴重，早前左眼角膜穿窿要做激光手術嘅社民連創黨主席黃毓民，月底28號又入廠，輪到黃斑點病變嘅右眼做手術。
黨員網上互隊睇到眼寃
據講白鴿黨有人以為已經冰釋前嫌，問候毓民病情，點知獲回敬一句「我有眼無珠」！
毓民稱，醫生講明做完呢次手術，眼球入面會有好多氣泡，右眼會暫時睇唔到嘢，如果幸運冇併發症，都要休養一個月，即係佢整個11月都要暫別江湖。
受眼疾困擾嘅立法會主席曾鈺成見到毓民，亦指佢「好大鑊」。
剛過59歲生日嘅毓民又話，自己計過數，現時乖孫3歲，假設自已冇穿冇爛有80歲命，只要好好保持身體健康，見證孫仔大學畢業應該唔係難事，所以日後會聽醫生勸告，睇少啲文件同上網，尤其少上facebook。
近日社民連中人在facebook激烈互隊，八方覺得毓民都係少上網為妙，否則真係隨時睇到眼寃，曾留言要求黨員停止互插嘅毓民深有同感：「真係唔盲都激到盲，盲完一隻盲第二隻！」