身為一等良民，八方奉公守法，支持警民合作，凡知道有任何為非作歹行為，必定第一時間召警，今日將會有一單非一般襲擊事件發生，請求警方密切留意。
將軍澳居民今日會包圍立法會，促請議員通過廢除擴大堆填區命令，西貢區議員何民傑會號召街坊參加，由於推翻特首指令勝算甚高，因此佢有備而來，何民傑透露，已買定10支香檳，一俟立法會投票廢除特首指令，佢同街坊會即時開香檳慶祝。
需知道喺特區開香檳隨時犯法，一次過開10支香檳，肯定唔係普通襲擊，直情係疑似恐怖襲擊，何民傑話開香檳前會發出溫馨提示，叫警員或保安唔好埋身，否則香檳泡冇眼，濺濕良民唔好入佢數。小小一個區議員竟然敢公然挑戰法律，一哥，香港仲有冇王法先？