每逢有爭議性條例提交立法會表決，政府就會出動一班AO狗仔隊，一人攞住一份印有幾十位議員嘜頭嘅名單，守住立法會每個出入口甚至廁所門口「點票」，一見支持政府嘅議員唔見人就即刻向上級滙報，慎防甩拖。
今日堆填區指令大戰之日，雖然當局打定輸數，但據聞都會照派狗仔隊出場，今次箍票焦點，反而落咗喺小組委員會身上，因此身為小組主席嘅公民黨陳淑莊不敢怠慢，調動自己以及公民黨辦事處至少四位議員助理做狗仔隊，今日駐守立法會大樓，金睛火眼實功能組別議員嘅去向，避免有議員借故出出入入失場，而令廢令議案戲劇性被否決。佢呼籲如果其他黨派議員助理有興趣幫拖，今日可以向佢報名，近日拍咗條片呼籲議員投票嘅陳淑莊透露，有議員同佢講睇完條片覺得非支持佢不可，令佢非常感動。