食家L之「留家廚房」與「黃色門」為國泰航空設計之飛機餐，有三個頭盤，六道主菜，一味甜品，在飛機上，當然食唔晒，亦都唔會擺晒出嚟！呢晚在清風街「留家廚房」一樓，就當私房菜咁食，食家L與太太親自坐鎮，果然好正，左丁山叫做大食，但食完第四道主菜之後，已經要叫投降，唔敢再食。L太又係中大畢業生，在崇基學院主修生物系，佢兩位嘅公子在美國攻讀工程，但回港之後，睇吓睇吓，原來更加鍾意「食物工程」，醉心於研究廚房內工程，於是一家三口一齊經營，食家L以藝術眼光設計賣相及內容，太太以生物學動物學知識研究蔬果豬牛羊肉，公子就以工程務實方法將各類原材料製造產品，正是三人一心，其利斷金，呢晚呈現眼前嘅飛機餐充份顯示出心意與創意。
先吃三道頭盤：（一）涼拌鮑魚，凍吃，相信在飛機上因毋須焗熱，也有同樣效果；（二）咖喱花枝沙律，只係微微辣，刺激食慾而已，絕大部份人士會認為辣得恰當，黃色咖喱配白色花枝及綠色青果，色彩夠晒輕鬆；（三）紅酒山楂蝦，食家L自己配製山楂汁與紅酒混合，味道夠鮮，微甜，用以醃製小蝦，無以尚之。
吃過頭盤，熱夠身嘞，主菜陸續出場：（一）牛肝菌雞湯，食家L聲言所有菜式不用味精。呢個熱湯用足料，人人讚好；（二）留家煙燻雞，用活雞，飛機上恐怕不可能矣；（三）煙燻普洱蜂蜜炆腩排，夠晒軟熟，女士食一塊可能已經超乎胃納；（四）麪醬酸梅燒秘製鱸魚，食到呢道菜，左丁山個胃已經發出警告，但因為麪醬酸梅嘅結合，十分奇妙，一於頂住頂住，食埋先；（五）白玉藏羅漢，吃了半塊冬瓜，唔掂咯，再食埋嘅話，要食胃藥；還有（六）野菌油漬鴨腿飯與甜品腰果南瓜露，未等到上枱，左丁山夠鐘打道回府，無法置評。
假如坐國泰商務位，食乜好呢？幾難揀，如果要一啲最接近地面食品味道嘅話，左丁山會揀紅酒山楂蝦，牛肝菌雞湯與鴨腿飯。我地一路食，食家L叫我地欣賞牆上黃永玉嘅作品，畫上有一首打油詩，係黃老題字送畀食家L嘅，十分過癮。