民主黨喺政改一役被好多長年支持者批評，痛罵佢哋轉軚、同中共做枱底交易，不過有失必有得，浸會大學香港過渡期研究計劃喺通過政改後做嘅調查顯示，816名受訪市民中，46%滿意民主黨表現，其中60歲至69歲，向來被視為建制派忠實擁躉嘅人，即係所謂鐵票，支持民主黨更達54%，支持民建聯嘅只佔四成，相差14個百分點，唔通真係風水輪流轉？
60%受訪80後青年不滿
負責研究嘅浸大政治及國際關係學系教授戴高禮坦言大跌眼鏡，佢一時間都解釋唔到原因，只係話如果民主黨想食住個勢，挖走民建聯呢啲鐵票，就要多做地區工作。至於如何搞，呢方面唔使學者教路，總之就多辦蛇宴、海鮮團，八方大膽推測，今年冬天蛇宴肯定又多又平，事關兩大「愛國政黨」競爭票源，民建聯唔頂爛市，點掹得住啲票。
不過浸大調查亦指出，20歲至29歲受訪80後青年中，有60%不滿民主黨表現，跟民建聯一樣咁唔得80後人心，算唔算贏粒糖、輸間廠呢？