俗語有云虎父無犬子，但原來呢句說話對外國人係唔Work嘅。前英格蘭隊長碧咸嗰3個囝囝，就似乎遺傳唔到Daddy嘅足球天份，話說大公子布魯克林上個周末喺加州聖塔莫尼卡代表太平洋海岸出賽，當時雖然有老竇碧咸帶埋兩個細佬羅密歐同告魯斯入場打氣，但唔知係布魯克林屎波定係隊波太渣冇得救，埋單淨吞5隻光蛋。碧咸臨場仲有啲腳痕，趁休息時間踩場，諗住教番兩個仔幾道散手，歡聚天倫嘅場面亦相當溫馨（圖）。可惜羅密歐同告魯斯竟然足球當欖球嚟玩，仲將老竇攬跌落地。睇嚟咸哥嘅七旋斬同罰球絕技，將會後繼無人喇！