商務及經濟發展局去年6月成立創意香港辦公室，噚日推出部門新標誌。創意香港總監廖永亮話，創作靈感好似火花，往往喺電光火石間湧現，因此選擇一個濺射火花做新logo，呢個閃一閃logo並非凡品，盛惠納稅人埋單85萬元。
創意辦做乜嘅呢？廖永亮賣花讚花香，指柏林影展水晶熊獎嘅《歲月神偷》，由創意辦電影發展基金融資，最近推出創意智優計劃，資助香港designer參加知名國際比賽，獲殊榮者最多有6萬蚊資助參賽費用同去海外攞獎。
香港設計師協會顧問彭志江指其實香港設計師早已揚名國際，好多設計國際知名，只係港府一直唔識貨，家陣先幫忙，遲做好過唔做。