【北京直擊】張學友嚟緊會喺內地搞巡迴演唱會，之前有一名沈姓女子，聲稱話可以一齊搞學友演唱會，點知後來學友經理人陳淑芬澄清根本冇授權呢位姓沈人士咁做，又強調對方唔係佢哋公司嘅人，結果搞到滿城風雨。
有人搶閘開記招
噚日學友同陳淑芬喺北京為巡迴演唱會開記者會，但係記招開始前一個鐘，一間名為「浙江世紀風采」嘅董事長祝偉民先搶閘舉行記招，聲稱要指控學友同陳淑芬。祝偉民話喺07年就經陳淑芬老公認識姓沈嘅人士，之後佢同嗰個人傾合作搞學友喺杭州、溫州以及長沙嘅三場演唱會，佢話之後就入咗300萬人民幣嘅定金到沈嘅私人戶口。
點知陳淑芬嘅天星娛樂公司之後表示根本冇委任姓沈嘅搞學友內地演唱會，佢公司仲同天星娛樂冇關，而祝偉民先前畀嘅300萬，定金就一直未有退回。
數猛男貼身護駕
祝偉民話曾經希望學友表態，但可惜佢冇任何表示，令祝偉民相當失望。
可能因為有人公開指摘，學友記者會上保安明顯加強，除咗飯店保安外，仲有幾位猛男貼身跟住學友，如臨大敵，但現場都有一位男士抗議，結果馬上被人帶走，而陳淑芬再次強調話：「這個事情跟我們沒有關係，這是北京天星的老員工個人行為，這筆資金已經被凍結。」而學友就隻字不提，只係話明年就50歲，所以演唱會名叫《1/2世紀》。