【本報訊】人質事件倖存者李瀅銓一直有留意菲律賓的調查報告，她昨晚再次翻閱報告及菲國總統阿奎諾三世的聲明，對於總統「放生」被調查委員會指為犯下嚴重錯誤的馬尼拉市長林雯洛，她感到極度憤怒。獲釋人質李奕彪也直斥，菲總統的決定會令國際社會認為菲律賓政治烏煙瘴氣。
「林雯洛製造好多危機」
「佢哋決定起訴警察總長馬格蒂拜，但係報告都講咗，馬格蒂拜有四個錯誤，當中有三個係聽林雯洛order做o架，咁你起訴得馬格蒂拜，竟然唔起訴叫佢咁做嘅林雯洛，你話係咪好離譜」。李瀅銓認為，林雯洛實在沒理由不受法律制裁，「報告有講，總統下午1時30分叫佢要確保人質安全，佢5點先到現場，槍手最初講係3點會開始殺人呀」。
她續稱，槍手門多薩約下午6時開第一槍，林雯洛在6時45分左右竟走去吃飯，還叫下屬去吃飯，林介入事件後，下令拘捕門多薩弟弟，「佢根本就製造咗好多危機，咁都唔起訴佢，真係好有問題，令人憤怒」。李奕彪十分不滿阿奎諾一直嬉皮笑臉，報告又沒交代Jason梁頌學受傷原因，他認為菲律賓的調查不會準確、不會找出真相。