大市雖然在睇好下成功克服海嘯位，惟最重磅兩隻藍籌仍未重見當日紅底價，此一時彼一時，始終呢轉升浪由資源商品帶動，亦反映靈活換馬較死守着數，呢次機會可以話係中美聯手嘅結果，多得阿爺畀佢哋嚟香港上市，亦多得美元跌到「散收收」，唔係邊得嚟咁一面倒。
當然，美元跌直接關我哋事又係要多得死守聯滙，手上有樓有股票嘅市民，直接感受到揸住資產嘅好處，非常享受呢一刻沐浴於資產泡沫中嘅感覺。當日聯繫滙率嘅守護神，3個已有兩個退咗休頤養天年，家淨番老曾，唔知係唔係真的要等到2012年，呢隻叫做聯滙嘅怪獸才會被打靶。
美國人不懂自我反醒，一味死撐，把過去於低息環境下罔顧風險胡亂消費引發嘅後遺症歸咎於中國，金融界永遠唯利是圖，有關人等搞咗幾年都未清楚應該點樣去管，即使點樣賊喊捉賊也是徒然，投資銀行唔見得較海嘯前更有道德，反而個個趁下一個財金官員自製泡沫爆破前趕快刮一筆然後速逃。
假如曹Sir之言不虛，今天已變身港產靈貓嘅前金管局總裁曾幾何時也認為弱美元帶來樓市泡沫唔係壞事，當泡沫一日唔爆、有人嚟香港買樓如買菜、大家司空見慣幾萬蚊一呎豪宅，6、7千蚊一呎嘅上車價就遲早會習慣成自然。
聯滙應盡快脫鈎
有朝一日個泡沫突然爆咗，亦可以好似有些分析員話一早提咗你，可惜問題嘅癥結聯繫滙率就從來好似忌諱咁打死都唔提，一談聯滙為之色變。當務之急，就係要把港元與美元盡快脫鈎，否則股市樓市只會被牽住鼻子走，處於被動。只可惜現在全球紛紛爭相自製滙率防護罩，脫鈎所產生的正面作用將大打折扣，家買你資產除咗因為貪平，多咗一個誘因來自影子人民幣資產升值元素。當然亡羊補牢未為晚也，不在其位者是否更應該講多一點真心話！
不過，有無發覺，通常每次當有人出咗發警告，個市都會好似報復咁癲多一排。
胡孟青
作者為獨立股評人