家陣股市炒到㷫烚烚，美國萬通就將「港人後海嘯投資習慣與策略」做咗個調查，喺1004個受訪者中，發現約七成人喺過去12個月都有參與投資，其中以投資股票、基金同埋投資相連保險最多，仲發現多咗人側重中國同埋香港嘅本土化投資，反而少咗「走出去」。
美國萬通亞洲首席市務總監蕭莉玲話，適當分散地緣風險會穩陣啲，不過佢都承認家中國同新興市場係威係勢，魅力又實在係沒法擋，佢提醒投資者，除咗分散地區投資，亦都要留意組合中嘅相連度，相連度低啲，意味嗰籃子入面嘅股票一齊唔掂嘅機會細啲！
調查又顯示，港人現時平均有五成半左右嘅資金放喺銀行存款及儲蓄保險，蕭小姐話，咁即係反映港人風險意識處較高水平，咁又係呀，經過雷曼一役，香港人點都會學精咗！
李華華