【Sa霆戀之鬥肉麻】被本報獨家踢爆的「Sa霆戀」主角蔡卓妍（阿Sa）和陳偉霆（William），昨日一起由鄭州甜蜜返港，William攬住阿Sa合照晒溫馨之餘，阿Sa更在微博狂晒幸福：「我現在很開心……很幸福。」至於William接受電台訪問時多次以SaSa相稱，認真骨痹肉麻。
現年27歲的蔡卓妍日前被本報率先踢爆去年跟24歲的陳偉霆拍攝電影《美麗密令》時秘密撻着，當時阿Sa尚未與鄭中基離婚，而William亦未跟Angelababy分手，男女關係七國咁亂。消息曝光後翌日，身在鄭州舉行歌友會的阿Sa和William齊齊公開承認戀情，但就異口同聲表示拍拖只有3個月。昨日，Sa霆由鄭州甜蜜返港晒溫馨。
「見工都有試用期」
昨午1時許，戴上大墨鏡的阿Sa跟William雙雙步出機場，雖然當時二人未有手拖手，但卻不時情深對望，記者要求二人站在一起合照時，William即主動攬住阿Sa，甜蜜到痹。其間有記者要求二人親嘴，嚇得阿Sa說：「唔係吖嘛！」
問阿Sa是否知道前夫鄭中基與有線主播余思敏拍拖？阿Sa笑說：「如果係真，我就祝福佢。」對於前夫祝福新戀情，阿Sa表示感謝。問William是否結婚對象？阿Sa即說：「交畀個天，見工都有試用期啦。」會否組情侶檔工作？阿Sa抗拒地說：「盡量唔好啦，咁得人驚！想開開心心，輕輕鬆鬆，正正常常拍拖。」
問William會否鏟走跟舊愛Angelababy愛的紋身時，他表示不用。記者追問二人是否拍拖一年，但William矢口否認。之後阿Sa與William各自乘保母車離開。
前晚和昨日，Sa霆不停在微博分享拍拖喜悅，William說：「謝謝大家的祝福。我會努力讓她開心快樂……放心！我會把肩膀練得強壯，背負更大的重量，使我們每步也走得輕一點。」阿Sa則謂：「我現在很開心……很幸福……」
「上次隱瞞好辛苦」
另方面，Sa霆昨日上午一起接受商台電話訪問，其間William更多次以SaSa相稱，相當肉麻骨痹。William說：「我同阿Sa一齊係真，係幾個月前嘅事，大家係單身後先一齊。」對於公開戀情，William謂：「大家考慮過，自己都有啲經驗，SaSa都有，知道有啲嘢係隱瞞唔到。」究竟如何開始，William拒絕透露，但就指他與阿Sa同是天蠍座，性格相似。究竟欣賞阿Sa甚麼？William說：「佢同埋個心，好似好肉麻咁呀！」可會追究今次為何被踢爆拍拖，William說：「唔想理，最重要SaSa開心。」
阿Sa被問到為何選擇公開戀情時說：「之前試過隱瞞，但覺得辛苦，不如輕鬆開心拍拖，好似平常人。我冇諗住好似上次咁隱瞞，但一齊唔係太耐，之前經歷過一次，唔係太好，想揀定啲，覺得好好先講畀大家知。家暫時都幾好，之後就等上天安排。」可曾為年紀差距而掙扎？阿Sa說：「喺感情路上都需要勇氣，人大咗都希望生活開心。」阿Sa表示不介意他人以「霆嫂」或「William嫂」稱呼。最後，阿Sa又不忘大讚新男友說：「佢令我學識樣樣嘢睇開啲，唔好太執着，唔好鑽牛角尖。」
採訪：魯萍、王連連
攝影：陳慧安、黃曉程
話你知：阿Sa、陳偉霆戀火蔓延
鄭中基緋聞女友Angelababy舊愛陳偉霆，與鄭中基前妻蔡卓妍拍拖，消息震驚全港。其實娛圈男女關係千絲萬縷錯綜複雜，今日是宿敵，他日隨時兄弟相稱。
相士話：Sa霆戀明年大考驗
陳偉霆與阿Sa昨日甜蜜搭膊頭現身機場晒幸福，不過網友普遍不看好這段情，網友「cookyqq」說：「我唔知阿Sa愛唔愛佢，但絕對相信的士（指William）唔係愛阿Sa，條友又博宣傳！」Twins粉絲更留言：「如果你真是婚內出軌，那麼我將會極度極度極度鄙視你！」
至於從玄學角度又會否看好William與阿Sa的戀情？堪輿學家麥玲玲說：「佢哋都係冬天出世，命格太似，所謂夫妻同命，拍拖比較難互補長短。至於阿Sa呢兩年嘅桃花運都OK，不過明年會有一個大考驗。」
採訪：林妃